هذا مشروع الطالبة" نسب"وهو مشروع تصميم مسكن خاص يتكون من طابق واحد والذي تم تصميمه خلال مساق
مبادئ التصميم البيئي والمعماري،،، المستوى الثـــــاني
وكان المشروع تحت إشراف:
أ.م . أحمـــــــــد الأسطل
م. هيفــــــــــــاء الشرفا
أحببنا أن نقدمه لكم كي يتم مناقشته تصميماً وإظهاراً ونتعلم من أخطائه لنتلافاها في المشاريع القادمة بإذن الله....
http://www.w6w.net/upload/03-08-2005/w6w_200508030701512bfd597f.JPG

http://www.w6w.net/upload/03-08-2005/w6w_20050803070657311cfa45.JPG

http://www.w6w.net/upload/03-08-2005/w6w_20050803070819fb7179b0.JPG

http://www.w6w.net/upload/03-08-2005/w6w_200508030709389955f2f0.JPG

http://www.w6w.net/upload/03-08-2005/w6w_20050803071135a192d499.JPG

http://www.w6w.net/upload/03-08-2005/w6w_20050803071300b9b2fd07.JPG

http://www.w6w.net/upload/03-08-2005/w6w_2005080307140279d65da2.JPG

http://www.w6w.net/upload/03-08-2005/w6w_200508030714568750cece.JPG

http://www.w6w.net/upload/03-08-2005/w6w_200508030716257b8fd5e7.JPG

:)

يعطيكي العافية أختي

عندي تعليق بسيط على المشروع
موزع غرف النوم
برأيي مزعج بعض الشي

ثاني شي احس المسقط مش متزن تمام

اما الاظهار
بصراحة عندي علامة استفهام
المسقط ملون بشكل رائع واعجبني جدا
ولكن الواجهات كأنها من مشروع يختلف عن المسقط
اتصور انك ما كنتي موفقة بتلوين الواجهات
يمكن الوقت ما ساعدك
استخدام الوان الباستيل جيد لكنه بحاجة لممارسة
ولو استخدم معها الالوان الخشبية بشكل مناسب لاصبح اجمل

اتمنى ما كنت اثقلت عليكي
اتمنالك التوفيق
والى الامام باذن الله

فعلاً الأخت نسب ما كان معها وقت وعملت الواجهات بسرعة ،،، لأني بعرفها وهي ما شاء الله عليها
بتتقن التلوين بالباستيل كتير بس هو من العجلة...
ننتظر تعليقات نسب ...

يعطيكي العافية عندي بعض التعليقات والتساؤلات
1-التكلف في تلوين المسقط والواجهات بشكل كبير وتغليب اللون الاحمو الغامق او النبيتي
2-تلوين ارضيات الحمامات والمطابخ باللون الاصفر بخلاف المتعارف عليه يعني اللون الازرق بسرعة يدل على الخدمات والدورات
3-تلوين الدرج والبرندات غالبا يكون رمادي وهنا مش مميز عن لون المسقط
4-رسم الدرج خطأ انظري للقطاع والواجهة وانظري لعدد الدرجات؟؟؟؟
5-الممر الطويل الذي هو اشبه بالحية والسلم "بازل""طويل وممل ومتكسر ومساحة كبيرة ضايعة
6-غرفة النوم الرئيسية عدد الشبابيك بها كثير ؟؟؟لماذا؟4 شبابيك يمكن 2.5م
غرفة النوم التي في نهاية المحور الطوالى بابها مواجه لباب البيت ..أين الخصوصية الذي يمشي بالشارع يكشف هذه الغرفة؟؟
7- الحوائط التى كل حائط يسير لوحده ليس له مرجع او امتداد
8- المسقط متل ما قال ابو حميد شكله غير متزن في مشكلة
9-الواجهات حلوة ولكن الالوان ضيعة جمالها
10-أين الظلال ؟؟تلوينك يعكس بالعكس؟؟

امجد يعطيك العافية على الوصايا العشر .... !!!
وبالنسبة للأخت نسب .. خلينا نحكي في المسقط ..
برايي انه الفكرة الولية (حرف L) حدث عليها تغير كبير ... واصبح المسقط لا يوحي بالحركة .. بل تحول الى نظام تجميع عشوائي للكتل ...
- الكراسي في الحمامات يفترض انها تكون على جدار خارجي وليس داخلي لتسهيل عمل التمديدات الصحية ..
- جناح غرف النوم في بروز وتلاعب بالكتل بيحجب شمس الصبحيات المفيدة
- الحركة بين الفراغات محلولة بشكل جيد بس يمكن لو فتحتي باب بسيط بين المطبخ وغرفة الطعام بكون افضل لنقل الأكل ..

اما بالنسبة للواجهات ... فاللون الأحمر جيد لكن مش في المناطق الجافة او حتى المعتدلة ...
اللون الأحمر الأفضل نستخدمه في المناطق الباردة او الثلجية لأنه بيعطي احساس بالدفء ...
كله للفايدة انشاء الله ..
ويعطيك العافية ..

مرحبا...
يعطيكي العافية اختي...
مشروعك جميل ...
انشا الله حعلق عليه بس بستني انو تعلقي ع الخوة اللي ردو...
يبدو انك دقيقة في شغلك ومميزة في الباستيل...
تحياتي

السلام عليكم.. ويعطيكم العافية جميعا...

حاولت أن أفكر بسرعة قد تكون مخلة أحيانا... ماذا لو تم تعديل المسقط... كما هو هنا... وماذا (ليس على المسقط) لو تم تبديل غرفة النوم الشرقية لتكون الرئيسية وحمامها هو المجاور وعليه يكون تعديل الحمام الثاني ليكون العام وأبواب غرف النوم الثانية لتكون الغرف غير الرئيسية.. العلاقات الوظيفية للجزء الأمامي بحاجة إلى مراجعة بسيطة جدا لعلاقة الضيوف مع الدورة مثلا... كنت قد علقت على مثل هذه النقطة لمشروع "رنا".. وأتمنى أن أسمع رد يقول أن هذه نقطة ليست ذات أهمية لأن الضيوف قد يحتاجون الدورة مرة في السنة (من محددات العلاقة الوظيفية كثرة استخدامها)...!!!!!



على أية حال... تعليقات المشاركين تستوفي أشياء أخرى مثل الإظهار والواجهات والمقاطع وغير ذلك.. والمشروع جهد معتبر بلا أدنى شك..




http://www.w6w.net/upload/08-08-2005/w6w_20050808082934171ab172.jpg

السلام عليكم
يعطيكي العافية أختي على المجهود
نبدأ الإيجابيات
تلوين المسقط روعة ومميز ...
الواجهات متزنة وحلوة وخاصة الواجهة الرئيسية وحكاية التراس اللي عليها أحلى
الكسرات كتير أعجبتني وفيها خروج عن الروتين اللي دايما نشوفه

أما السلبيات
الإظهار بالباستيل بدو شوية اتقان
بالنسبة للظلال بالمرة ما هي صحيحة :( هي اللي ما أظهرت الواجهات كما ينبغي
عندك مزعات كتير في المسقط

عندي سؤال عن نوع الألوان اللي لونت المسقط فيها؟؟؟؟؟؟؟؟؟؟

وياريت تعلقي وتجاوبي عن تساؤلاتنا

وبصراحة أحب أحيكم على جرأتكم وحبكم لنقد مشاريعكم
لأنه كتير راح يفيدكم ويفيد غيركم

السلام عليكم و رحمة الله و بركاته جميعا؛
"زميلات و زملاء و مهندسين"

بداية بحب أتوجه بالشكر لأختي سميرة ولمنتدى معماري اللي أتاحلي هالفرصة لحتى أستفيد من ملاحظاتكم و نقدكم البناء
"ولو انكم ظلمتوني شوي "...

بعرف اني اتأخرت عليكم بالرد ؛
مرت سنة تقريبا على عرض المشروع ...
بس كان لازم يجي يوم و أرد ؛ و بالتالي استحملوني ...

بصراحة :
"ما شاء الله عليكم مفصلين الشغل تفصيل ..."
بالمرة الأولى اللي شفت فيها تعليقاتكم بتزكر اني قلت: ما شاء الله عليهم دكاترة ..."
عموما بعض الملاحظات كانت بمحلها خصوصا اللي اتفضل فيها الدكتور أنور؛ و بعضها الاخر لأ من وجهة نظري ...
و عموما العمارة كلها وجهات نظر ؛
ما في قوانين و قيود , كل معماري بيعبر عن شخصيته من خلال أعماله ...
بصراحة اكتر مو عارفة من وين أبدا ...

بس قررت ابتدي مع الوصايا العشرة او الاتهامات العشره اللي اتفضل فيها الزميل أمجد اللي كتير حبيتها من خلال أسلوبه المستفز :

1-أخي الكريم ؛ المسقط و الواجهات ما فيها أي تكلف في التلوين بالعكس هادي ابسط الطرق اللي بستخدمها في الاظهار , كنت بتمنى توضح هالنقد و تقولنا وين التكلف بالضبط لحتى اعرف ارد عليك بدقه اكبر ...
و تغليب اللون الاحمر؛ زي ما قلت انه الالوان بتعبر عن نفسية و شخصية المصمم وهاللون كان بيستهويني بهديك الفتره ومن هالنقطة بتوجه للأخ يحيى اللي عقب على نفس الموضوع ؛ يمكن يكون هاللون قليل الاستعمال في المناطق المعتدله ؛الا انه موجود فعليا وكانلي مشاهده لأكتر من فيلا سكنيه بالقطاع بنفس هاللون ...
2-"الظاهر انه حكاية الالوان مزعجاك كتير أخي أمجد" ؛ بس للأمانه استخدامي للون الاصفر كان خلل فني ؛ بس انا اعتبرته سليم مجازا ؛ ما تستغرب لمن اقولك انه في بلاط بهاللون ؛ و انا عادة لمن بصمم او أظهر بحب انه يكون الامر واقعي وموجود فعلا ... ما بعرف ازا حتتقبل هالكلام كمبرر؟!!!
3-البرندات و الدرج ؛ مش حكرر كلامي بس فعليا بيكونو بنفس لون بلاط البيت أو حتى متلائمين مع اللون العام للبيت و بالتالي الامر منهي من وجهة نظري ؟!!!
4-قطاع الدرج ما في أي أخطاء! أرجو انك تعيد النظر و توضحلي وين المشكله ؟ للأستفاده طبعا !!!
5-الشبابيك كتير!!! هو مزبوط بيطلعو 4 شبابيك بس فتحة الشباك ضيقه يعني كل شباكين بشباك؛ و يمكن هالامر بيرجعلي لأني بحب البيت المليان شبابيك ... "ربنا لا يخنق حد "
6-الممر الطويل اللي شبهته بالحية و السلم ؛ يمكن يكون طويل بس مساحته متناسبه مع مساحة المسقط و التكسرات اللي فيه هي اللي وفرت الخصوصيه اللازمة " اللي بيمشي في الشارع ما بيكشف أي غرفة " لو أعدت النظر حتكتشف انك مخطىء!!!!!!
7-يمكن معك حق في نقطة مرجع الحوائط الا انه بعضها اله مرجع ؛ و عموما انا ما كنت على دراية تامه بهالموضوع ومن بعد مساق تشييد 1 راعيت هالامر بمشاريعي ...
8-ردا على اتزان المسقط ؛ أنا شايفاه متزن و بأيام المناقشه ما كان في أي تعليق على هالنقطة من المدرسين ؛ برجع بقول وجهات نظر ...
9-فعلا ألوان الواجهات ما كانت معبره عن جمالها و السبب كان ضيق الوقت .
10-الظلال: لوحة الواجهات كانت اخر لوحه بظهرها و كنت بقمة الارهاق و الظاهر انه اثر بالسلب على كل تفاصيل الاظهار بما فيها الظلال ؛ اللوحة اتلونت بربع ساعة و طبيعي اتكون النتيجه هيك!!!!
بتمنى اتكون ردودي خفيفة عليك أخ امجد؟؟!!!!

و بجوله سريعة على بقية التعليقات :
*بحيي اخي ابوحميد على دقة الملاحظه ؛ فعلا المسقط كان اله النصيب الاكبر من الوقت في الاظهار ؛" و لو ان اللوحات كلها تم اظهارها ب 6 ساعات".
*أخي يحيى ؛ يمكن مفهوم الكونسيبت ما كان بهالوضوح عندي ؛ بس اللي حصل فعلا اني ابتديت الفكره من شكل حرف L
و حصل عليه تطورات غيرت شكله نهائيا ؛ و عند تعبيري عن الكونسيبت كنت بسترجع هالاحداث مش اكتر و كنت متأكده انه حيكون في نقد بهالنقطه ... و بالتالي بحييك على هالنقد .
)الكراسي في الحمامات يفترض انها تكون على جدار خارجي وليس داخلي لتسهيل عمل التمديدات الصحية ..)
يمكن الان صار عندي فكره عن الموضوع بس قبل سنة كانت حتكون جديده عليا؛ و بالتأكيد حنعرف هالتفاصيل من مساق التركيبات الصحيه ...

*و بالرد على الاخت دانيه ؛ الالوان المستخدمه البريزما و الباستيل ...

نهاية ؛ بشكركم كمان مره و بتمنى لطلاب المستوى التاني انهم يستفيدوا من ايجابيات هالمشروع و يتجنبو سلبياته.
و بوعدهم بعرض" فيلا تصميم 1" لحتى يلاحظو التطور الكبير في التصميم و يستفيدو منه خصوصا انه من المشاريع المتميزة ...

*و بتمنى تكون الردود بمكانها و ما أكون طولت كتير عليكم ؛ ويا رب نحتفل بالسنة التانيه للمنتدى و اكون عضوة فعاله فيه ...

تحياتي : نسب الشحـــــــام

السلام عليكم
ياهلا فيكى يانسب نورتى المنتدى
وان شالله تصيرى عضوة فعالة زى ما حكيتى
تحياااتى

مش شايف صور يا جماعه

إن شاء الله اخي الكريم بحاول إعادة تحميل الصور في أقرب فرصة....

أود ان احيطكم علما اخواني القائمين على ادارة الموقع بعدم ظهور الصور المرفقة مع الصفحة والتي تمثل التصاميم مع تحياتي لكم.....

الله يعطيك العافية

مشكور على الجهد

الصور مش ظاهره ليه

امممم


الصور موب واضحه ^_^

يعطيكي العافية نسب

الواحد ما بخاف عليكي

تحيتي شوشا